Gova lea dahkan Melissa, Itálias

Go Mu Suorgi Stuorru

Go vástidit njeallje KIDLINK-jearaldaga de jurddahallet manin áiggut šaddat go stuorut ja movt máilbmi galggašii leat buoret báiki go don stuorut. Go mii jurddašit sohkamuoraid birra, de mii maiddái jurddašit soga boahttevaš buolvvaid birra. Makkár máilbmi sin vuordá? Makkár deaŧalaš áššiid leat oahppan máttuineamet? Makkár árbevieruid ja árvvuid leat sii addán midjiide maid mii háliidit fievrredit min mánáide ja áhkkubiidda ja áddjubiidda? Dán bihtás mii guorahallat dieid jearaldagaid.

Digaštallan - jearaldagat

Jurddahala daid háviid go čohkkádit boarraset fulkkiiguin ja guldalit go sii muitaledje dutnje muitalusaid. Guđiid muittuide liikot buoremusat? Muital midjiide muhtumiid dáin muitalusain. Go earát listserv:s juogadit sin muitalusaid dinguin, de galgabehtet fal buktit mearkkašumit ja jearahit sis. Movttiidahttet guhtet guimmiideattet ja muitalehket guhtet guimmiidasadet go liikobehtet juoga masa maid earát muitalit.
Makkár iešvuođat du máttuin leat du mielas rámálmas iešvuođat? Lea go dus dihto fuolki gii lea du movttiidahttán bargat buriid? Muital midjiide dan fuolkki birra. Gos son orui? Mainna son barggai? Lea go son ain eallime? Dihtet go sii ahte don anát sin ovdagovvan?
Doaivvut go ahte du máttut jurddašedje soga boahttevaš buolvvaid birra ja makkár eallimiid sii ožžot? Don leat boahttevaš buolva. Adde go du mielas du máttut dutnje buoret máilmmi go mii sis lei? Fertet bealuštit iežat vástádusa.
Makkár máilmmi sávat iežat mánáide ja áhkkubiidda/áddjubiidda go sii sturrot? Maid livččet rievdadan min máilmmis nu movt dat lea dál?
Makkár fidnu sávat alccesat go šattat rávisolmmožin? Lea go oktage eará du sogas válljen seamma fidnu? Lea go oktage du sogas movttiidahttán du válljet dihto fidnu?
Maid doaivvut ahte oainnášit jus sáhtášit oaidnit iežat mánáid boahtteáiggi? Mainna lágiin doaivvut ahte eallin livččii earalágan? Movt don ráhkkanat iežat boahtteáigái? Lea go mihkkege maid dál sáhtášit bargat ráhkkanan dihte boahtteáigái? Movt du máttut ráhkkanedje boahtteáigái?
Movt sáhttet bearašlahtut doarjut guhtet guimmiideaset bajásšattadettiin? Jeara iežat váhnemiin lei go sin mielas álkit leat mánná go sii ledje nuorat, vai lea go sin mielas dutnje álkit leat mánnán dálá máilmmis?
Gallát mánná don leat bearrašis? Leat go don boarraseamos, gaskaleamos vai nuoramus mánná vai leat go don áidna mánná? Movt dát váikkuha du rollii bearrašis? Jus leat boarraseamos, lea go du mielas dutnje biddjojuvvon eambbo ovddasvástádus go earáide? Lea go dat dutnje ávkin boahttevaš bargodilis?
Jus leat nuoramus mánná, doaivvut go ahte oaččut bargat muhtun áššiid dušše danne go leat nuoramus?
Makkár árbevieruid, mat du bearrašis leat, háliidivččet fievrredit viidáseappot boahttevaš buolvvaide? Čilge midjiide dáid árbevieruid listserv:s. Lehpet go álggahan ođđa árbevieruid bearrašis maŋemus áigge, maid boahtibehtet viidáseappot fievrredit?
Jus sáhtášit váikkuhit du mánáid boahtteáigái, movt de áiggušit váikkuhit? Makkár fuomášupmi dagašii eallima buorebun boahttevaš buolvvaide?
Lea go du mielas mis ovddasvástádus váldit vára eatnamis vai boahttevaš buolvvain lea dearvvašlaš ja oadjebas orrunsadji? Maid mii sáhtášeimmet bargat čájehan dihte ahte mii dohkkehit dán ovddasvástádusa?

Klássalatnja - doaimmat

Ráhkat Venndiagrámma ja buohtastahtte du dálá skuvladili du áhkuid ja ádjáid skuvladiliin, go sii ledje oahppit. Mii lea ovttaládje? Mii lea rievdan?
Čále erenoamáš báhpirii muitalusa maid boarraset fuolki lea dutnje muitalan, tevdne dasa govaid ja ráhkat heivvolaš olggoža dahje ovdasiiddu dasa. Ráhkadehket čájáhusa klássas mas čájehehket muitalusaid.
Čohkke daid máttuid biografiijaid geaidda liikot buoremusat. Čohkke nu ollu dieđuid daid máttuid birra go sáhtát eará fulkkiin, beaivegirjjiin, reivviin, govain, biibbaliin ja buot eará neavvuin maid gávnnat. Bija dáid dieđuid iežat sohkamurrii.
Guorahala iežat fulkkiid, ja ráhkat gráfa dain fidnuin maid sii leat válljen. Lea go oktage fidnu mii spiehkasta earáin? Manne doaivvut nu leat?
Guorahala iežat klássa-ustibiid, ja ráhkat gráfa das gallát mánnán sii leat bearrašis. Leat go din klássas eanaš boarraseamos, gaskaleamos, nuoramus vai áidna mánát?
Geahča iešguđet kategoriijaid mánáid persovnnalašvuođaid. Sáhtát go árvalit maidege das maid oainnát? Leat go bearraša gaskaleamos mánát lotkadeappot go earát, vai leat go sii nággáreappot go earát? Maid don doaivvut? Doaivvut go ahte gallát mánná don leat bearrašis váikkuha persovnnalašvuođa ovdáneapmái?
Ráhkat gihppaga mii čájeha erenoamáš sohkaárbevieruid maid din sohka ávvuda. Bija daid iežat sohkamurrii.
Ráhkat dáiddadávvira KIDLINK KidSpace:s mii lea deaŧalaš oassi du árbbis. Čilgehussii sáhtát čállit makkár lea oaidnit, masa geavahuvvui, guđe riikkas dat bođii/boahtá, maid dat mearkkaša ja maid dat mearkkaša du sohkii dahje du kultuvrii.
Govahala ahte fertet ráhkadit ođđa logo iežat riikii (dahje eará riikii). Oaččut váldit mielde vaikko maid mii du mielas ovddasta du riikka, muhto ale vikka váldit mielde leavgga dahje eará našuvnnalaš symbolaid. Tevdnejehket dahje málejehket árvalusaideattet. Digaštallet guhte logo heive din riikii buoremusat. Gehččet IRC:s sáhttibehtet go ráhkadit logo ovttas earáiguin geat vázzet eará skuvllas, dahje sáhttibehtet go humadit daid symbolaid birra maid lehpet válljen.
Muhtun riikkat áigot fargga váldit EU-ruđa atnui. Jus orut dáin riikkain, de sáhtát tevdnet makkár du mielas galggašii ruhta leat oaidnit. Ane vaikko maid, maid oaivvildat govvidit ahte du riika lea oassi Eurohpas. Humadehket symbolaid birra maid lehpet atnán, ja din boares ruđaid symbolaid birra. IRC:s humadehket eará skuvllaid ohppiiguin daid symbolaid birra maid lehpet geavahan. Vaikko din riika ii áiggo ge geavahit Euro, de sáhttibehtet goitge bargat dán doaimma.
Ane buot dieđuid, buot govaid ja buot áđaid maid leat čohkken sohkamurrii dán gávcci vahkkus, ja ráhkat lágiduvvon vuorkká mii ovddasta du soga. Ovdanbuvtte vuorkká iežat klássii.