Erenoamáš Dárbbut

From Iceland

Bures!

Dán vahkku bargguin deattuhit hástalusaid mat doaimmashehttejuvvon mánáin leat. Sin sávaldagat, niegut ja balut leat juste seamma go eará mánáin. Sis lea maid riekti eallit rikkis ja somás eallima.

Muhtomin eat oainne doaimmashehttejuvvon mánáin eará dan maid sii eai sáhte bargat. Lea dehálaš muitit ahte juohke mánná lea erenoamáš ja ánssáša vejolašvuođaid šaddat ja ovdánahttit iežas buriid beliid. Katrina govva muittuha midjiide ahte doaimmashehttejuvvon mánát maiddái liikojit stoahkat olgun.

Loga golmma bealjehis oahppi sádden reivviid geat deive Kidlink mánáid digaštallamis doaimmashehttejuvvon mánáid 1993:s.

From Iceland

1. Goappa váillahivččet eambbo - iežat čalmmiid vai iežat beljiid?
2. Movt doaivvut mánná gii lea juovlastuolus sáhttá vuoitit gilvvus dahje oassálastit báddegaikumis?
3. Movt bealjehis mánát gulahallet? Gávdno go okta oktasaš «giella» maid sii atnet, vai rievddadit go gielat dan mielde gos orrot? Gii fuomášii sin giela?
4. Maid don doaivvut stuorámus hástalussan doaimmashehttejuvvon mánáide du skuvllas dahje du gilis?
5. Movt du mielas orušii jus don it beasaše seamma skuvlii gos du olbmát leat, muhto šattašit baicca eará skuvlii gos leat dušše doaimmashehttejuvvon mánát?
6. Lea stuora erohus leat čalmmeheapmin riegádusas juo ja čalmmehuvvat maŋŋil eallimis. Makkár erohusaid doaivvut das leat?
7. Sáhtát go fuobmát goas čalmmehis mánás soaittášii leat ovdamunni dakkár máná ektui gii oaidná?
8. Sáhttet go mánát geat leat juvlastuolus johtit lanjas latnjii du skuvllas? Leat go čuovgaculccit dan mađe vuollin ahte oahppit geat leat juvlastuoluin olahit cahkkehit čuovgga?
9. Galggaše go du mielas doaimmashehttejuvvon mánát leat dábálaš luohkáin eará ohppiiguin, vai galggaše go sii leat sierra luohkáin dahje skuvllain?
10. Mii lea «paralympics»? Mii lea dán gilvvohallama ulbmil?
11. Sáhtát go namuhit olbmuid geat leat doaimmashehttejuvvon muhto goitge ollašuhttet stuora áššiid eallimis? Maid sii barget ja manne dat lea hirpmáhuhtti?
12. Maid don dagašit jus fáhkkestaga šattašit doaimmashehttejuvvon? Movt don doaivvut du eallin rievddašii?
13. Maid mii sáhttit oahppat doaimmashehttejuvvon olbmuin?
14. Leat go doaimmashehttejuvvon mánáin unnánit, liikká ollu vai eambbo vuoigatvuođat go dus?

Luohkkálatnja Doaimmat

1. Ovttasbargga muhtuniin du luohkás. Váldde liinni. Siđa iežat olbmá čatnat dan du čalmmiid ovdii. Daga dán ovtta diimmu skuvllas. Lonoheahke rollaid. Čále movt lei go liidni lei čalmmiid ovddas ja máid váillahit eanemusat.
2. Movt mánát geain lea heajos oaidnu ivdnejit? Geahččaletnot! Váldde ivdnenárkka mas lea stuora govva ja vuoidda liimma gova mielde. Divtte liimma goikat. Bija liinni čalmmiid ovdii. Váldde ivdnenliántta ja ivdne liibmasázuid gaskka.
3. Ráhkat skovi mas leat guokte ráiddu ja čále daid diŋggaid maid váillahivččet jus it oainnáše dahje it gulaše.
4. Jus du skuvllas lea oktage gii lea čalmmeheapmi, de luohkká ráhkada spealu maid čalmmehis mánát sáhtáše stoahkat vaikko eai oainne.
5. Geahča Eŋgelas čalmmehemiid alfabehta ja geahččal lohkat sáni mii lea čállojuvvon čalmmehemiid čállinvuogi mielde. Makkár lassi bustávat dárbbašuvvojit du alfabehtii? Makkárat leat dat bustávat čalmmehemiid čállinvuogis?
6. Ráhkat iežat «čalmmehemiid alfabehta» go anát jorba gortniid, riisaid dahje bábuid. Liibme daid ruktobáhpirii go ráhkadat alfabehta. Ráhkat dajaldaga iežat alfabehtain ja siđa iežat skuvlaoappáid ja -vieljaid dulkot du dieđu.
7. Ohppet movt dadjat moadde dajaldaga dahje osiid oanehis lávlagis seavagillii ja čájehehket eará luohkáide din skuvllas.
8. Ráhkadehket plakáhtaid buoridan dihte guottuid doaimmashehttejuvvon mánáid ektui. Heŋgejehket daid luohkkálatnjii ja skuvlii.
9. Bargabehket joavkkuin hábmet «ideála» skuvlla buot ohppiide, maiddái doaimmashehttejuvvon ohppiide. Galggašii go din skuvllas leat mihkkege mii din skuvllas ii leat dál? Galget go din ideála skuvllas leat guokte gearddi ja heaissat, vai galgá go leat viiddis skuvla mas lea dušše okta geardi? Sárggo skuvlla ja merke buot lanjaid.